БЕСЛАН.РУ

Æртыццæджы Дзæуджыхъæуы хицауады хæдзары Битарты Вячеслав фембæлд республикон Олимпиадæйы уæлахиздзаутимæ ирон æвзаг æмæ ирон литературæйæ. Республикæйы сæргълæуæг раарфæ кодта сывæллæттæн, сæ ныййарджытæн, æмæ ахуыргæнджытæн. «Стыр бузныг уын зæгъын. Абон кадджын бæрæгбон у, куыд Цæгат Ирыстоны, афтæ Хуссар Иры дæр. Бæрæгбон та уымæн у, æмæ нæ мадæлон æвзаджы бон у. Не ‘взаг куы фесафæм, уæд ирон адæмыл нымад нал уыдзыстæм. Уымæ гæсгæ мын тынг æхсызгон у, сымах хуызæн кæстæртæ нæм кæй ис. Сымах нæ фидæн стут. Сомбон сымахæй аразгæ у. Абоны бон æгъдауыл хæст стут æмæ уын уый тыххæй бузныг зæгъын. Мæ зæрдæ уын зæгъы, цæмæй уæ дарддæр дæр сæрыстыр уæм. Уæлдай бузныг дæн уæ ныййарджытæй. Хæдзары ирон ныхас куы нæ хъуыса, уæд, цавæрфæнды закъонтæ куы сфидар кæнæм, уæддæр ирон æвзаг нæ фæтыхджындæр уыдзæн. Уымæй уæлдай стыр бузныг зæгъын уæ ахуыргæнджытæн. Уымæн æмæ уын æнæ уыдонæй уыйбæрц нæ бантыстаид. Мæ зæрдæ дарын, цыфæнды хъуыддаджы дæр æнтыстджын кæй уыдзыстут, Ирыстоны та сымах хуызæн кæстæртæ фылдæр кæй уыдзæн», — загъта республикæйы разамонæг. Црауы хъæуы 11 къласы ахуырдзау Æмбалты Алинæ фæбæрæг кодта ахæм хуызы мадзæлтты ахадындзинад. «Мах абон не ‘взаг бахъахъхъæныныл куы нæ бацархайæм, уæд фесæфдзæн, мах та адæмыхатт нал уыдзыстæм. Уымæн та уæвæн нæй. Хорз уаид, ахæм конкурстæ арæхдæр куы кæниккой. Стыр бузныг зæгъын республикæйы разамындæн æмæ Цæгат Ирыстоны сæргълæууæг Битарты Вячеславæн, ирон æвзагмæ ахæм хъусдард кæй æххæст кæнынц, уый тыххæй», — загъта уый. Нæ ныхасмæ ма бафтауæм, скъоладзауты олимпиадæйы республикон къæпхæны уæлахиздзаутæ ирон æвзагæй систы: — Джаджиты Даниэль (Кучиты Ю.С. номыл 27-æм скъола), — Къораты Дианæ (Змейкæйы станицæйы Советон Цæдисы Хъæбатыр А.А. Бондары номыл 1 астæуккаг иумæйагахуырадон скъола), — Æмбалты Алинæ — Црауы хъæуы астæуккаг иумæйагахуырадон скъола, — Слонаты Ланæ («Гимнази «Диалог»), — Гуыдиаты Виктория (Советон Цæдисы дыууæ хатты Хъæбатыр Плиты Иссæйы номыл 26-æм астæуккаг иумæйагахуырадон скъола), — Пагæты Георгий (Æрыдоны 1 астæуккаг иумæйагахуырадон скъола). Ирон литературæйæ: — Куыдзиаты Дзерассæ (Змейкæйы станицæйы Советон Цæдисы Хъæбатыр А.А. Бондары номыл 1 астæуккаг иумæйагахуырадон скъола), — Къораты Дианæ (Змейкæйы станицæйы Советон Цæдисы Хъæбатыр А.А. Бондары номыл 1 астæуккаг иумæйагахуырадон скъола), — Хуыбежты Кристинæ (Джызæлы хъæуы Коцойты Арсены номыл 1 астæуккаг иумæйагахуырадон скъола), — Дзабиты Аминæт (Советон Цæдисы дыууæ хатты Хъæбатыр Плиты Иссæйы номыл 26-æм астæуккаг иумæйагахуырадон скъола).

"15-Й РЕГИОН"