Главная - Новости Беслан

23/01/2015 “Уадз æмæ нæ горæты цæрджытæ зоной, мысайнæгтæ цы фæвæййынц, уый”

Ног 2015-æм аз размæ атындзыдта, æмæ ацы рæстæг алы куыстуат, алы æхсæнадон уагдон дæр хынцы ивгъуыд азы бæрæггæнæнтæ. Æрæджы нæм редакцимæ уазæгуаты æрбацыдысты Беслæныхъæуы Лæгты Дзуары кувæндоны Советы сæрдар Алыккаты Хасан æмæ районы Ныхасы ревизион къамисы сæрдар Кцойты Гермæн.

Фарон нæ газеты фæрстыл кувæндоны Советы архайдыл цалдæр хатты лæмбынæг фыстам, йæ хъæппæрисæй цы хорз хъуыддæгтæ арæзт æрцыд, уыдонимæ базонгæ кодтам нæ горæты цæрджыты. Цыбырæй ма уын сæ æрлæууын кæндзыстæм уæ зæрдыл – къорд хатты зиу сарæзтой, ныссыгъдæг кодтой ацы зæдбадæн бынат, бырон аластой. Сарæзтой, дыууæ сæдæ лæджы кæм сбада, ахæм дыууæ сарайы. Акалдтой зæронд бæлæстæ, сæ бæсты сын ныссагътой заз бæлæстæ, сæрмагондæй сæм фæцыдысты Кæсæг – Балхъары Республикæмæ, афтæмæй сфæлгонц кодтой бæстыхай. Кувæндонмæ бацæуæны сагъд æрцыд зынгхуыст хъæбатыр Джыбылаты Зауры номарæн аллея, æхцайы фæрæзтæ радта Зауры мад Берозты Зæлинæ.
Бирæ ныхæстæ цæуы, республикæйы иуæй-иу кувæндæтты, дам, дзуапджын лæгтæ æхцатæм фæныхилынц. Цæмæй уыцы ныхæстæн бындур ма уа, уый тыххæй Беслæныхъæуы кувæндоны дзуары лæгтæ - æхцатыл дзуаппдæтджытæ Болиаты Батрадз æмæ Ходы Батрадз сисынц æхцатæ мæй, кæнæ дыууæ мæймæ иу хатт, æвдисæн та вæййы Кцойты Гермæн.
Фарон афæдзæй-афæдзмæ цы фæрæзтæ æрæмбырд кувæндоны, уыдонæй куывдыл схардз кодтой 232263 сомы. Районы хъæуты куывдтæм дæр хуынд вæййынц нæ горæты минæвæрттæ æмæ сæм æгъдауимæ ацæуынц – уыцы хъуыддæгтæн дихгонд æрцыд 17 мин сомы. Кувæндоны æфснайæджы мызд - фондз мин сомы мæймæ, æхсай мин сомы афæдзмæ; банчы процент – 11997 сомы; дыууæ сарайы саразынмæ бахъуыд 218088 сомы; мигæнæнтæ, кусæнгæрзтæ балхæнынæн – 27608 сомы; районы Ныхасæн материалон æххуыс – 10 мин сомы; Олгинскæйы хъæуы администрацийæн баххуыс кодтой 10 мин сомæй; сылгоймæгты Советæн радтой æртæ мин сомы; кувæндоны цъæх фæлыстыл бахардз кодтой 61193 сомы. Ацы азы фыццæгæм январмæ кувæндоны кассæйы уыдис 114843 сомы.
- Уадз æмæ нæ горæты, районы цæрджытæ зоной, мысайнæгтæ цы фæвæййынц, куыд хардзгонд æрцæуынц, уый, - æмдзыхæй загътой Хасан æмæ Гермæн.
Ног аз æрбалæууыд, æмæ кувæндоны Советмæ дæр ис ног фæндтæ. Бон цæуы æмæ фарн хæссы. Нæ горæты фарныл архайынц Хасан, Гермæн, стæй сæ фарсмæ лæуджытæ, æмæ сæ фæрнджын куывдтытæ уæлæрвтæм куыд хæццæ кæной, хорзырдæм куыд зыной Ирыстоны дзыллæтыл, ахæм арфæйы нæ бафтауæд Дунесфæлдисæг.

"Вестник Беслана"

 

Комментарии:

Комментарии к данной записи отсутствуют

Добавить комментарий

Имя:  

Уведомить меня о новых комментариях